વિદ્યાર્થીનો ઉત્તર

શાળાનો ઘંટ વાગ્યો.

મેદાન આખું ઠલવાયું વર્ગખંડમાં,

પાટલીઓ પર બેઠી છે એશી આંખો, 

આંખોમાં એમનાં સપનાઓ તરે છે, 

ને તરે છે એમાં નિખાલસતાની નાવો. 

જિજ્ઞાસાની જ્યોત પ્રગટેલી છે આંખોમાં.

શિક્ષકે સહાસ્ય પ્રશ્ન કર્યો વર્ગમાં -

આજે કોઈ ચીજ રહી છે અશક્ય?

વિજ્ઞાને કશું જ અસંભવ નથી રાખ્યું. 

બધું જ આજે તો શક્ય બન્યું છે.

છેલ્લી પાટલી પરના ગભરુ વિદ્યાર્થીનો ઉત્તર -

સાહેબ કહું! એક ચીજ છે અશક્ય આજે

શિક્ષકનો પ્રતિપ્રશ્ન - કઈ છે તે ચીજ?

વિદ્યાર્થીએ બીતા બીતા જવાબ આપ્યો - 

સાહેબ, પ્રામાણિકતા.